ຂ່າວ

1-3 ອົງສາແຂວງຫົວພັນ-ແຂວງຜົ້ງສາລີ ນ້ຳໝອກກາຍເປັນນ້ຳແຂງຍາມເຊົ້າ

ແຂວງຫົວພັນ-ແຂວງຜົ້ງສາລີ ນ້ຳໝອກກາຍເປັນນ້ຳແຂງຍາມເຊົ້າ

ເລີ່ມມີນ້ຳກ້າມຂາວດັ່ງຫິມະແລ້ວ ເຊົ້ານີ້ 7/12/2019 ທີ່ເມືອງ ຫົວເມືອງ ແຂວງຫົວພັນ ອາກາດໜາວ ອຸນຫະພູມຫຼຸດລົງຈຸ 3 ອົງສາ ເຮັດໃຫ້ໝອກກ້າມຂາວດັ່ງສະໂນ(ຫິມະ). ບ່ອນທ່ານຢູ່ ໜາວປານໃດ?

ແຈ້ງການສະບັບທີ່ 01 ເນື່ອງຈາກວ່າມວນອາກາດຫນາວເຢັນຈາກປະເທດຈີນໄດ້ມີກໍາລັງແຮງເພີ່ມຂຶ້ນ ແຜ່ລົງມາປົກຄຸມຢູ່ທົ່ວທຸກ ພາກຂອງປະເທດລາວດ້ວຍກໍາລັງແຮງ, ສົມທົບກັບລົມຕາເວັນອອກສ່ຽງເຫນືອພັດປົກຄຸມເປັນສ່ວນໃຫຍ່ ໃນໄລຍະ ວັນທີ 04 ຫາ 10 ທັນວາ 2019, ຊຶ່ງຈະເຮັດໃຫ້ອຸນຫະພູມອາກາດຫຼຸດລົງ 5 ຫາ 7 ອົງສາ

ອາກາດຈະຫນາວເຢັນ ຫາ ຫນາວເຢັນຫຼາຍ ພ້ອມມີຫມອກຫນາປົກຫຸ້ມໃນຕອນເຊົ້າຢູ່ເຂດແຂວງພາກເຫນືອ, ແຂວງ ໄຊສົມບູນ ແລະ ເຂດພູພຽງ ບໍລະເວນ. ສ່ວນພາກກາງ ຫາພາກໃຕ້ ອາກາດເຢັນ ຫາ ຫນາວເຢັນ, ພ້ອມມີຫມອກບາງປົກຫຸ້ມໃນຕອນເຊົ້າ ແລະ ມີ ລົມພັດແຮງເປັນບາງໂອກາດ. ອຸນຫະພູມອາກາດຈະຫຼຸດລົງ 3 ຫາ 5 ອົງສາ.

ດັ່ງນັ້ນ, ຈື່ງແຈ້ງເຕືອນເຖີງອໍານາດການປົກຄອງ ແລະ ປະຊາຊົນບັນດາເຜົ່າທີ່ອາໄສຢູ່ບັນດາເຂດແຂວງດັ່ງກ່າວ ໃຫ້ມີສະຕິລະມັດລະວັງຕໍ່ສະພາບອາກາດຫນາວເຢັນ ແລະ ມີລົມພັດແຮງ, ໃຫ້ຮັກສາສຸຂະພາບ ນຸ່ງຫົ່ມໃຫ້ຮ່າງກາຍ ອົບອຸ່ນຢູ່ສະເຫມີ ພ້ອມນີ້ຂໍໃຫ້ຕິດຕາມຂ່າວພະຍາກອນອາກາດຈາກ ກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ

ແຂວງຜົ້ງສາລີມີ7ເມືອງຄື: ເມືອງຜົ້ງສາລີ, ເມືອງໃໝ່, ເມືອງຂວາ, ເມືອງສຳພັນ, ເມືອງບຸນເໜືອ, ເມືອງບຸນໃຕ້ ແລະ ເມືອງຍອດອູ ຄືດິນແດນທີ່ແອັດມິນຢາກໄປທີ່ສຸດແຂວງໜຶ່ງຂອງເມືອງລາວ ສ່ວນເຫດຜົນກໍຍ້ອນວ່າຢາກຄົ້ນຫາວ່າດິນແດນແຫ່ງນັ້ນມັນມີຫຍັງທີ່ໂດດເດັ່ນ ເມື່ອປຽບທຽບໃສ່ແຂວງອື່ນໆ

ນອກນັ້ນອີກເຫດຜົນໜຶ່ງກໍຍ້ອນໃນສະໄຫມເປັນນັກສຶກສາຢູ່ມະຫາວິທະຍາໄລແຫ່ງຊາດ ໄດ້ໃກ້ຊິດພົວພັນກັບຄົນຜົ້ງສາລີ ແບບວ່າ ຕົ້ມໝີ່ເຕັມໝໍ້ແບ່ງກັນກິນມາກໍຫຼາຍຄັ້ງ ເຮັດໃຫ້ເກີດຄວາມຮັກແພງກັນ ອີກເຫດຜົນໜຶ່ງກໍແມ່ນຫົວໃຈ ແອບປັນໃຈໃຫ້ສາວຜົ້ງສາລີ ຕັ້ງແຕ່ສະໄໝເປັນນັກຮຽນມັດທະຍົມ ຄັ້ງທີ່ເຄີຍມາສອບເສັງນັກຮຽນເກັ່ງມໍ6 ທີ່ນະຄອນຫຼວງວຽງຈັນ

ການເວລາຜ່ານໄປ ຈົນມາຮອດປີ2017 ການເດີນທາງສູ່ແຂວງຜົ້ງສາລີ ກໍເກີດຂຶ້ນ ກັບທິບສຸດໂຫດ 11ມື້ 10 ຄືນ ຈາກນະຄອນຫຼວງວງວຽງຈັນ ສູ່ດິນແດນຜົ້ງສາລີ ດ້ວຍລົດຈັກ ຜ່ານແຂວງວຽງຈັນ, ໄຊຍະບູລີ, ບໍ່ແກ້ວ , ຫຼວງນໍ້າທາ, ອຸດົມໄຊ ລັດເລາະລຽບຊາຍແດນລາວ-ຈີນ ທີ່ເມືອງນາໝໍ້ ເຂົ້າສູ່ເມືອງບຸນໃຕ້ ເມືອງບຸນເໜືອ ແລ້ວກໍຮອດເທດສະບານຜົ້ງສາລີ ໃນເວລາ 23 ໂມງ
ຜົ້ງສາລີ ເປັນເມືອງທີ່ແຕກຕ່າງຈາກບັນດາແຂວງອື່ນໆຂອງປະເທດ ເພາະຕົວເມືອງຕັ້ງຢູ່ລຽບຕາມສັນພູ ເຮັດໃຫ້ເປັນຄວາມງົດງາມທີ່ຫນ້າຫຼົງໄຫຼ.ຫາກຖາມວ່າໄປຮອດຜົ້ງສາລີແລ້ວຈະທ່ຽວຫຍັງ ມີຫຍັງໂດດເດັ່ນ. ຄວາມຈິງກໍມີຫຼາຍຢ່າງທີ່ປະທັບໃຈເຊິ່ງຂໍສັງລວມດັ່ງນີ້:

1.ຕົວເມືອງ: ຕົວເມືອງຜົ້ງສາລີເປັນຈຸດຂາຍໜຶ່ງ ທີີ່ສາມາດດຶງດູດຜູ້ມາຢາມເພາະມັນມີຄວາມພິເສດແລະ ງົດງາມເມື່ອແນມເບິ່ງບ້ານເຮືອນທີ່ຕັ້ງຢູ່ລຽບຕາມເປີ້ນພູ

2.ວິຖີຊີວິດ: ຜົ້ງສາລີ ມີຫຼາຍຊົນເຜົ່າທີ່ຍັງຮັກສາໄດ້ວີຖີຊີວິດດັ້ງເດີມ ເຮົາຈະເຫັນຊາວເມືອງນຸ່ງຊຸດຊົນເຜົ່າມາເລາະຕະຫຼາດ ແລະ ຂາຍເຄື່ອງ; ປະຊາຊົນຢູ່ຕາມບ້ານເຮືອນກໍຍັງນຸ່ງຖືຊຸດທີ່່ເປັນເອກະລັກຂອງຊົນເຜົ່າຕົນ.

ຫາກມີການຈັດສັນພັດທະນາທີ່ດີ ມັນຈະເປັນຈຸດເດັ່ນແລະຈຸດຂາຍທີ່ສຳຄັນ ເໝືອນດັງກັບເມືອງທ່ຽວທ່ຽວຊາປາຂອງຫວຽດນາມທີ່ເຮົາໄປໃສ່ກໍຈະເຫັນຊາວເມືອງນຸ່ງຊຸດຊົນເຜົ່າເຕັມໄປໝົດ ແລະ ນັ້ນຄືມົນສະເໜທີ່ມັດໃຈຜູ້ມາຢາມ

3.ຈຸດຊົມວິວພູຟ້າ:ພູຟ້າ ແມ່ນມິ່ງຂວັນຂອງຊາວເມືອງ ຕັ້ງຢູ່ຕາເວັນອອກສຽງເໜືອ ຂອງຕົວເມືອງຜົ້ງສາລີ; ພູຟ້າມີຄວາມສູງ 1.625 ແມັດ ທຽບຈາກໜ້ານ້ຳທະເລ, ມີຂັ້ນໄດຂຶ້ນ 863 ຂັ້ນ ເມື່ອຂຶ້ນພູຟ້າຈະສາມາດແນມເບິ່ງຄວາມງົດງາມຂອງຕົວເມືອງຜົ້ງສາລີ ໄດ້ຢ່າງງົດງາມັທ ງໃນຍາມເຊົ້າ ເບິ່ງທະເລໝອກ ແລະ ຍາມແລງຕາເວັນລາລັບຂອບຟ້າ

4.ຊິມຊາ400ປີ :ສວນຊາ 400 ປີ ຕັ້ງຢູ່ທີ່ບ້ານກໍແມນ ໄລຍະທາງປະມານ 15 ກິໂລແມັດ ຈາກເມືອງຜົ້ງສາລີໄປທາງທິດຕາເວັນຕົກ ເປັນບ້ານນ້ອຍໆ ແຕ່ມີຄວາມງົດງາມຂອງທຳມະຊາດແລະສວນຊາ ຫາກໄປຍາມເຊົ້າໃນລະດູໜາວ ກໍຈະມີທະເລໝອກໃຫ້ໄດ້ເບິ່ງ. ຫາກມີການຈັດສັນແລະປັບປຸງພັດທະນາສິ່ງອຳນວຍຄວາມສະດວກ ກໍຈະເຮັດໃຫ້ເປັນອີກຈຸດທ່ອງທ່ຽວໜຶ່ງທີ່ຫນ້າສົນໃຈ

ນອກຈາກນີ້ກໍຍັງມີອີກຫລາຍຢ່າງທີ່ທີ່ເປັນຈຸດເດັ່ນຂອງຜົ້ງສາລີ ດັ່ງຄຳຂວັນ“ຜົ້ງສາລີ ປຽບຄືດັ່ງສະຫວັນສັ່ງ ວິມານດ່ານແດນພູດອຍ ເປັນດິນແດນວິລະຊົນ ຮັກຄອນພົງພັນເຊື້ອ ງາມເຫຼືອຫຼາຍພູຟ້າ ທະເລຫຼວງຫມອກໃຫຍ່ ເຊີນຊິມຊາພູຟ້າ ດື່ມເຫຼົ້າຂຽວ ເອ່ວສະຖານທີ່ ເບິ່ງຮີດຄອງປະເພນີເອກະລັກຫຼາຍເຜົ່າເຊື້ອ ເປັນຂອງຕ້ອນທ່ານຜູ້ຊົມ

ແຂວງຜົ້ງສາລີ ຕັ້ງຢູ່ພາກເໜືອສຸດຂອງປະເທດເຮົາ ມີເນື້ອທີ່ທັງໝົດຫຼາຍກວ່າ 16.000 ກິໂລຕາແມັດ, ທິດຕາເວັນອອກມີຊາຍແດນຕິດກັບ ສສ ຫວຽດ ນາມ ແລະ ທິດຕາເວັນສ່ຽງເໜືອຕິດກັບ ສປ ຈີນ. ປະກອບມີຫຼາຍຊົນເຜົ່າຄື: ລາວ, ລື້, ຫໍ້, ກໍ່, ຢ້າວ, ກຳພູຊາງ, ຜູ່ນ້ອຍ, ມົ້ງລາຍ, ກຶມມຸ ແລະ ເຜົ່າອື່ນໆ.