ບັນເທີງ

ໃຜແນ່ເປັນ ? ຮັກແມ່ ແຕ່ບໍ່ກ້າບອກ, ບໍ່ກ້າກອດແມ່ ຕົງໆ ມາເບີ່ງວິທີບອກ

ເຄີຍບໍ່ ? ຮັກແມ່ ແຕ່ບໍ່ກ້າບອກ, ບໍ່ກ້າກອດແມ່ ຕົງໆ?

ເລີຍຊອກຫາວິທີອື່ນມາແທນເອົາ. ວັນແມ່ປີນີ້ເລີຍຂໍແບ່ງ ວິທີນັ້ນມາເປັນຄຳແນະນຳດີໆ ໃຫ້ທຸກຄົນ. ສຳລັບຄົນທີ່ຍັງອາຍບໍ່ກ້າບອກ, ບໍ່ກ້າຫອມແກ້ມ ແລະ ບໍ່ກ້າກອດແມ່(ໂດຍສະເພາະແມ່ນຜູ້ຊາຍ). ເຮົາກໍ່ຄວນສັນຫາເຮັດແນວອຶ່ນ ເພື່ອເປັນການບົ່ງບອກວ່າເຮົາຮັກແມ່, ໃຫ້ແມ່ຮູ້ເຖິງການກະທຳ ແລະ ສຳພັດເຖິງຄວາມຮັກຂອງເຮົາເອງ. ກ່ອນອຶ່ນໝົດເຮົາກໍ່ຄວນເບິ່ງກ່ອນວ່າແມ່ເຮົານອນຢູ່ໃນປະເພດໃດ, ຈາກນັ້ນເຮົາກໍ່ເຮັດໃຫ້ຖືກຕາມສະໄຕລ໌ ຂອງແມ່ເຮົາ, ມາອ່ານນຳກັນເລີຍ:

1. ຖ້າແມ່ຂອງເຈົ້າເປັນຄົນໃຈບຸນ ທຳມະທຳໂມ.
ສະແດງຄວາມຮັກໂດຍການປ່ຽນບັນຍາກາດ, ຂັບລົດພາແມ່ ອອກນອກບ້ານໄປເຮັດບຸນ, ໃຫ້ວພຣະ, ຕາມວັດ ແລະ ສະຖານທີ່ຕ່າງໆ ເທົ່ານີ້ກໍ່ສຸກໃຈແລ້ວ ແຖມຍັງອິ່ມບຸນອິ່ມໃຈອີກ.

2. ຖ້າແມ່ຂອງເຈົ້າເປັນນັກຊີມ, ນັກກິນ, ເປັນຄົນມັກແຕ່ງອາຫານກິນເອງ.
ສະແດງຄວາມຮັກໂດຍການປ່ຽນບັນຍາກາດ ອອກໄປກິນເຂົ້ານອກບ້ານ, ປ່ຽນຮ້ານໃໝ່ໆ, ບັນຍາກາດດີໆ, ເພື່ອຈະເຮັດໃຫ້ແມ່ປະທັບໃຈ, ດີບໍ່ດີແມ່ອາດຈະໄດ້ເມນູຢູ່ຮ້ານມາເຮັດໃຫ້ເຮົາກິນຢູ່ບ້ານນຳອີກ.

3. ຖ້າແມ່ຂອງເຈົ້າເປັນຄົນທີ່ມັກຈ່າຍຕະຫຼາດ, ມັກເລາະຊອ໋ບປິ້ງ ຊື້ເຄື່ອງ.
ເອົາໃຈແມ່ປະເພດນີ້ງ່າຍໆ, ໄປເບິ່ງວ່າ ຢູ່ບ່ອນໃດ ມີໂປຼໂມຊັ້ນ, ມີງານອີເວັ້ນ ຫຼື ມີງານສະແດງສິນຄ້າຕ່າງໆ ແລ້ວພາແມ່ໄປເລາະຊື້ເຄື່ອງ, ໄປທ່ຽວຊົມງານ.

4. ຖ້າແມ່ຂອງເຈົ້າເປັນຄົນມັກທ່ອງທ່ຽວ, ຊົມທຳມະຊາດ.
ຈັດທຣິບ ພິເສດເລີຍ, ພາແມ່ໄປທ່ຽວພັກຜ່ອນ, ກິນລົມ ຊົມອາກາດສົດ. ເອົາຕາມເງື່ອນໄຂສະດວກ, ພາໄປແຖວນອກໆ, ວິວງາມໆ, ພາໄປຫຼີ້ນນ້ຳຕົກ, ຫຼື ຖ້າມີມື້ພັກຫຼາຍໆກໍ່ໄປຕ່າງແຂວງ ຫຼື ຕ່າງປະເທດເລີຍ.

5. ຖ້າແມ່ຂອງເຈົ້າມີໂລກປະຈຳໂຕ, ຕຸ້ຍ, ເມື່ອຍງ່າຍ.
ເອົາໃຈແມ່ໂດຍການບີບນວດເສັ້ນ ນວນເອັນ ເພື່ອຜ່ອນຄາຍ. ຫຼືຄັນບໍ່ກ້າກໍ່ພາໄປຮ້ານສະປາດີໆ ມີບັນຍາກາດດີໆ,ໃຫ້ແມ່ສະບາຍ, ໄດ້ດົມກິ່ນສະປາ ເທົ່ານີ້ກໍດີນັກແລ.

6. ຖ້າແມ່ຂອງເຈົ້າ ມັກຫຼີ້ນກິລາ.
ຫາໂອກາດດີໆໃນການເຮັດກິດຈະກຳຮ່ວມກັນເຊັ່ນ: ພາໄປຍ່າງ, ໄປ ແລ່ນຢູ່ແຄມຂອງ ຫຼື ສວນສາທະລະນະຕ່າງໆ, ໄປສູນກິລາ, ຊວນລາວຫຼີ້ນໃນສິ່ງທີ່ລາວມັກ. ອາດຈະພະນັນກັນຫຼີ້ນໆ ວ່າໃຜແພ້ຕ້ອງລ້ຽງເຂົ້າ ອີ່ຫຍັງປະມານນີ້.

7. ຖ້າແມ່ຂອງເຈົ້າ ເປັນຄົນທັນສະໃໝ ໄຟແຮງ ປານໄວລຸ້ນ.
ພາແມ່ໄປເຮັດສວຍເຮັດງາມເລີຍ, ໄປເຮັດຜົມ, ເຮັດສີເລັບ, ນວດໜ້າ ຂັດຜິວ, ພາໄປຊື້ເຄື່ອງນຸ່ງ ແລະ ເຄື່ອງປະດັບໄປເລີຍ.

ນອກຈາກແຕ່ລະແບບທີ່ເວົ້າມາຂ້າງເທິງນັ້ນ ຍັງມີແມ່ ອີກຫຼາຍໆປະເພດ, ເຊິ່ງແອັດມິນເອງກໍ່ບໍ່ສາມາບັນລະຍາຍລົງໃນທີ່ນີ້ໄດ້ໝົດ, ສະນັ້ນເລີຍສະຫຼຸບເປັນຄຳແນະນຳດີໆດັ່ງນີ້:

=> ບໍ່ຈຳເປັນຕ້ອງບອກຮັກ, ຕ້ອງກອດ,ຕ້ອງກາບຕີນ… ຂໍພຽງແຕ່ເຮົາເຮັດສິ່ງໃດສິ່ງໜຶ່ງໃຫ້ແມ່. ຄືຖ້າບໍ່ຮູ້ຈະເຮັດຫຍັງກໍ່ ຊື້ເຄື່ອງນຸ່ງ, ຊື້ສິ້ນໃຫ້ແມ່ເພື່ອເປັນຂອງຂັວນ.

=> ຫາໂອກາດພາແມ່ໄປຫຼີ້ນ ຢ່າງໜ້ອຍກໍ່ໃຫ້ແມ່ຜ່ອນຄາຍສະບາຍໃຈ ແລະ ລວມເຖິງໂຕເຮົານຳ.

=> ສູດມາດຕະຖານ, ສົມມາແມ່ ພ້ອມກັບສິ້ນ,ຫຼື ຜ້າບ່ຽງງາມໆ ຫຼື ເງິນຈັກເັລກນ້ອຍ, ເປັນວິທີທີ່ດີທີ່ສຸດ ເຮັດໃຫ້ຊີວິດເຮົາມີແຕ່ຄວາມຈະເລີນຮຸ່ງເຮືອງ ແລະ ເຮັດໃຫ້ແມ່ສະບາຍໃຈ.

=> ຖ້າແຕ່ງກິນເປັນກໍ່ລອງເຂົ້າຄົວເຮັດອາຫານ ໃຫ້ແມ່ກິນເບິ່ງ ແມ່ອາດຈະປື້ມໃຈ

=> ອອກຕະຫຼາດຊື້ຫຍັງມາໄວ້ເຕັມຕູ້ເຢັນ,ແລ້ວບອກວ່າຢາກກິນຫຍັງກິນໄດ້ຕາມໃຈ ວັນແມ່ຍິງປີນີ້.

=> ສັງເກດເບິ່ງເຄື່ອງໃຊ້ຂອງແມ່ ມີຫຍັງເກົ່າແລ້ວກໍ່ຊື້ໃໝ່ໃຫ້ເຊັ່ນ: ໂທລະສັບ, ເສື້ອຜ້າ, ເຄື່ອງໃຊ້ຕ່າງໆ..

=> ຖ້າບໍ່ຮູ້ຊິຊື້ຫຍັງໃຫ້, ງ່າຍໆ ເອົາເງິນໃສ່ຊອງໃຫ້ແມ່ ແລ້ວບອກວ່ານີ້ເປັນຂອງຂັວນເລັກໆນ້ອຍໆ ແມ່ຢາກໄດ້ຫຍັງ ຢາກກິນຫຍັງຊື້ກິນໂລດເດີ້… ປະມານນີ້

…….

ຍັງມີອີກຫຼາຍຮ້ອຍວິທີ ທີ່ເຮົາສາມາດເຮັດເພື່ອບົ່ງບອກເຖິງເຮົາຮັກແມ່. ທີ່ບໍ່ແມ່ນຄຳເວົ້າ, ໃຫ້ແມ່ສຳພັດໄດ້ແລະຮັບຮູ້ເອງ. ນີ້ເປັນພຽງສ່ວນໜຶ່ງ ຂອງຄຳແນະນຳທີ່ແອັດມິນເອງໄດ້ລວບລວມມາຝາກ. ແລະ ກໍ່ບໍ່ຈຳເປັນຈະເຮັດແຕ່ວັນແມ່ວັນດຽວ. ຖ້າຍັງມີໂອກາດຢູ່ ກໍ່ຮີບສະແດງຄວາມກະຕັນຍູໃຫ້ແມ່ເຫັນ ກ່ອນຈະບໍ່ມີໂອກາດໄດ້ເຮັດ. ສາມາດເຮັດວັນໃດກະໄດ້. ເນື່ອງໃນໂອກາດວັນແມ່ ແລະ ວັນແມ່ຍິງທີ່ມາເຖິງນີ້ ໃນນາມແອັດມິນເພສ ທີ່ປຶກສາບັນຫາຊີວິດ,ຄອບຄົວ ແລະ ຫົວໃຈ ຂໍອວຍພອນໃຫ້ແມ່ຍິງທຸກໆຄົນ ເວົ້າສະເພາະກໍຄືໃນນາມຜູ້ທີ່ເປັນແມ່ ຈົ່ງມີແຕ່ຄວາມສຸກ, ຄວາມຈະເລີນ ອາຍຸຍິ່ງຍືນຍາວຄຽງຄູ່ລູກຫຼານຕະຫຼອດໄປ.