ບັນເທີງ

ໃຜເເນ່ເຄີຍເປັນ ຢູ່ດີໆຄົນຮັກກໍປ່ຽນໄປ ມັນເກີດຫຍັງຂື້ນ ຍ້ອນຫຍັງ ?

ເປັນຫຍັງລະ ? ຢູ່ດີໆ ຄົນທີ່ເຮົາຮັກຈຶ່ງປ່ຽນໄປ ?
ມີຫຼາຍຄົນກຳລັງມີບັນຫາເລື່ອງແຟນຂອງຕົນເອງປ່ຽນໄປ, ບາງຄົນກໍ່ວ່າເຂົາບໍ່ສົນໃຈ, ບາງຄົນກະວ່າເຂົາບໍ່ໃສ່ໃຈ, ບາງຄົນກະວ່າເຂົາບໍ່ມີເວລາໃຫ້ຄືແຕ່ກ່ອນ… ຍ້ອນຫຍັງລະ ?

ກ່ອນອຶ່ນໝົດ ໃຫ້ເຮົາສັງເກດເບິ່ງລະອຽດວ່າ ຕົ້ນເຫດມາຈາກຫຍັງ?ຖ້າມີເລື່ອງໃຫ້ຜິດກັນ ແລ້ວລາວປ່ຽນໄປ ກະອາດຈະຮູ້ດີ ວ່າທີ່ປ່ຽນໄປແມ່ນຍ້ອນເລື່ອງໃດ. ແຕ່ສຳລັບຜູ້ທີ່ບໍ່ໄດ້ຜິດກັນຢູ່ດີໆເຂົາກໍ່ປ່ຽນໄປເລື່ອງນີ້ຕ້ອງໄດ້ເບິ່ງຫຼາຍໆປັດໃຈແລ້ວ…ດັ່ງນັ້ນ ໃຫ້ສັງເກດ 3-4 ກໍລະນີດັ່ງຕໍ່ໄປນີ້:

1. ຫຼື ຈະມີບັນຫາເລື່ອງວຽກ ຫຼື ຄອບຄົວລາວ:
ກ່ອນອຶ່ນໝົດຄຳຖາມທຳອິດ ແຟນຂອງເຮົາມີວຽກຫຍັງ,ເຮັດວຽກຫຍັງ, ເລື່ອງວຽກການງານຂອງເຂົາມີບັນຫາຫຍັງບໍ່, ລາວຄຽດເລື່ອງວຽກບໍ່.. ຫຼື ຄອບຄົວລາວກຳລັງມີບັນຫາຫຍັງບໍ່ ? ອັນນີ້ຄວນສືບລະອຽດ, ຖ້າບໍ່ໄດ້ຄຳຕອບຈາກລາວໂດຍກົງກໍ່ຄວນຖາມຄົນໄກ້ຊິດລາວ ຫຼື ໝູ່ສະໜິດລາວທີ່ວາງໃຈໄດ້. ແລ້ວກໍ່ຄວນປ່ອຍລາວແກ້ໄຂບັນຫາຂອງລາວ ເຮົາມີໜ້າທີ່ໃຫ້ກຳລັງໃຈ.

2. ຫຼື ຈະເປັນຍ້ອນໂຕເຮົາ ?
ອ້າວ… ເປັນຫຍັງວ່າຊັ້ນ ? ຍ້ອນວ່າຫຼາຍຄົນນັ້ນເມື່ອຮູ້ສຶກຢ້ານເສຍຄົນທີ່ຕົນເອງຮັກໄປ,ກໍ່ພະຍາຍາມເຮັດທຸກຢ່າງຍ້ອນຢ້ານເສຍລາວໄປ. ແຕ່ການທີ່ເຮົາພະຍາຍາມດຶງເຂົາໄວ້ນັ້ນ,ເຮົາອາດຈະບໍ່ຮູ້ໂຕວ່າສິ່ງທີ່ເຮົາເຮັດໄປນັ້ນມັນຫຼາຍເກີນໄປຈົນລົ້ນ,ເລີຍເຮັດໃຫ້ເຂົາລຳຄານກໍ່ມີ. ມີອີກກໍລະນີໜຶ່ງຄື ເຮົາມັກໄປຈູ້ຈີ້ຈັບຜິດຫຼາຍເກີນໄປ, ລອງຄິດພາບວ່າກຳລັງຄຽດຈາກເລື່ອງອື່ນໆມາຢູ່, ກຳລັງຕ້ອງການກຳລັງໃຈບາດແລ້ວ ມາເຈິຖາມສໍ້ນັ້ນສໍ້ນີ້ ຈັບຜິດເຮົາຢູ່ນັ້ນມັນກະເຮັດໃຫ້ເຂົາມີສິດເບື່ອເຮົາ ແລະ ລຳຄານເຮົາໄປເລີຍ,ແລ້ວກໍ່ປ່ຽນໄປແບບຖາວອນ.

3. ຫຼື ຈະຍ້ອນປັດໃຈທີສາມ ?
ປັດໃຈທີສາມແມ່ນຫຍັງ ? ປັດໃຈທີສາມຄືບັນດາມືທີ່ສາມ ຫຼື ຄົນໄກ້ໂຕລາວ,ເຊັ່ນລາວຕິດໝູ່ຫຼາຍເກີນໄປບໍ່?ຕິດຫຼິ້ນ, ຕິດກິນ,ຕິດການພະນັນ… ຫຼືມີຄົນຮັກອີກຄົນໄວ້ໂດຍທີ່ເຮົາບໍ່ຮູ້..ກໍລະນີນີ້ກໍ່ຄວນຫາທາງຕັດໄຟແຕ່ຕົ້ນລົມ, ຄັນລາວຫາກໍ່ເລີ່ມເປັນກໍ່ຄວນຫາທາງນັ່ງລົມເປີດໃຈລາວຕົງໆ, ລົມລາວດີໆ, ແລ້ວຂໍລາວປ່ຽນ…ແຕ່ຖ້າລາວບໍ່ປ່ຽນ ຫຼື ເລື່ອງມັນບານປາຍແລ້ວກໍ່ຄົງຈະເຮັດຫຍັງບໍ່ໄດ້ນອກຈາກທຳໃຈຍອມຮັບຄວາມຈິງ.

4. ຫຼື ຍ້ອນມັນບໍ່ມີຫຍັງປ່ຽນແປງຈາກເດີມ ?
ຄືມີຫຼາຍຢູ່ ທີ່ຄົບກັນດົນເຕີບແຕ່ບໍ່ມີຫຍັງປ່ຽນແປງ,ເຄີຍເຮັດຫຍັງກະເຮັດແນວນັ້ນ,ຊີວິດບໍ່ເຕີມເຕັມສິ່ງໃໝ່ໆໃຫ້ກັນ ຈົນກະທັງເຮັດໃຫ້ຊີວິດຄູ່ຈືດຊືດ, ເມື່ອເຈິແຕ່ສິ່ງເດີມໆເກົ່າໆແບບນີ້ໄປເລື້ອຍໆ ກໍ່ເຮັດໃຫ້ເລີ່ມເບື່ອໄປກະມີ,ກໍລະນີນີ້ ເມື່ອໄປເຈິສິ່ງໃໝ່ໆທີ່ມັນເຮັດໃຫ້ຕື່ນເຕັ້ນ ແລະ ຄັກກວ່າ ເຂົາກໍ່ມີສິດໄປຈາກເຮົາໄດ້

ນອກຈາກນີ້ຍັງມີຫຼາຍໆປັດໃຈ, ຫຼາຍໆສາເຫດ. ດັ່ງນັ້ນ, ເຮົາຄວນຄິດ ແລະ ສັງເກດຢ່າງລະອຽດ ວ່າເຮົາຕົກໃນກໍລະນີໃດ, ເມື່ອຖືກເຮົາກະຄວນຫາທາງແກ້ໄຂແຕ່ຫົວທີ, ກ່ອນມັນຈະສວຍຈົນເກີນໄປ.