ຂ່າວ

ໂຈະການຮຽນຂອງຊັ້ນອະນຸບານ ແລະ ປະຖົມ ທົ່ວແຂວງບໍ່ແກ້ວ ຈົນຮອດ 1 ກຸມພາ 2021 !!

ໂຈະການຮຽນຂອງຊັ້ນອະນຸບານ ແລະ ປະຖົມ ທົ່ວແຂວງບໍ່ແກ້ວ ຈົນຮອດ 1 ກຸມພາ 2021

ແຈ້ງການ ເລື່ອງ: ການເລື່ອນເວລາເຂົ້າຮຽນຂອງຊັ້ນອະນຸບານ ແລະ ປະຖົມ ທົ່ວແຂວງບໍ່ແກ້ວ. 22 ມັງກອນ 2021

ເປັນພຽງພາບປະກອບຂ່າວເທົ່ານັ້ນ

ພະແນກສຶກສາທິການແລະກີລາ ແຂວງບໍ່ແກ້ວ ໄດ້ອອກແຈ້່ງການໃນວັນທີ 22 ມັງກອນ 2021 ເຖິງທ່ານ ຫົວຫນ້າຫ້ອງການສຶກສາທິການ ແລະ ກິລາເມືອງ 5 ເມືອງ; ເລື່ອງ: ການເລື່ອນເວລາເຂົ້າຮຽນຂອງຊັ້ນອະນຸບານ ແລະ ປະຖົມ ທົ່ວແຂວງ.

ເປັນພຽງພາບປະກອບຂ່າວເທົ່ານັ້ນ

ອີງຕາມ ທິດຊີ້ນໍາຂອງ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ຂັ້ນແຂວງ ໃນກອງປະຊຸມວັນທີ 22 ມັງກອນ 2021 ,  ອີງຕາມ ການຕົກລົງເຫັນດີເປັນເອກະພາບ ຂອງຄະນະພະແນກສຶກສາທິການ ແລະ ກິລາ ແຂວງບໍ່ແກ້ວ.

ເປັນພຽງພາບປະກອບຂ່າວເທົ່ານັ້ນ

ຫ້ອງການ ພະແນກສຶກສາທິການ ແລະ ກິລາແຂວງ ຂໍຖືເປັນກຽດແຈ້ງທິດຊີ້ນໍາຂອງຫົວຫນ້າພະແນກສຶກສາທິ ການ ແລະ ກິລາແຂວງ ມາຍັງທ່ານຊາບວ່າ ເນື່ອງຈາກມີຂ່າວຄົນຈີນທີ່ຕິດເຊື້ອພະຍາດໂຄວິດ-19 ລັກລອບເຂົາມາ ແຂວງບໍ່ແກ້ວ, ປັດຈຸບັນຄະນະສະເພາະກິດຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ຂອງແຂວງ ພວມດໍາເນີນການກວດເຂັ້ມ ຕໍ່ກັບພາກສ່ວນທີ່ກ່ຽວຂ້ອງ.

ເປັນພຽງພາບປະກອບຂ່າວເທົ່ານັ້ນ

ສະນັ້ນ, ເພື່ອເປັນການປ້ອງການ ແລະ ຄວບຄຸມການລະບາດຂອງພະຍາດໂຄວິດ-19 ບໍ່ໃຫ້ແຜ່ລະບາດເຂົ້າ ໃນໂຮງຮຽນ, ຂະແຫນງການສຶກສາ ແລະ ກິລາ ແລະ ແຂວງບໍ່ແກ້ວຂອງພວກເຮົາ. ພະແນກສຶກສາທິການ ແລະ ກິລາແຂວງ ຈຶ່ງເຫັນດີເປັນເອກະພາບ ເລື່ອນເວລາການເຂົ້າຮຽນຂອງຊັ້ນລ້ຽງເດັກ, ອະນຸບານ ແລະ ຊັ້ນປະຖົມສຶກສາທົ່ວແຂວງ ນັບທັງພາກລັດ ແລະ ພາກເອກະຊົນ ໄປເຂົ້າຮຽນໃນວັນທີ 1 ກຸມພາ 2021 ພ້ອມກັບຊັ້ນມັດທະຍົມສຶກສາ.

ເປັນພຽງພາບປະກອບຂ່າວເທົ່ານັ້ນ

ພ້ອມດຽວກັນນັ້ນ, ກໍມອບໃຫ້ຄູ-ອາຈານ ແນະນໍານັກຮຽນ ທີ່ຢູ່ໃນຄວາມຮັບຜິດຊອບພາຍໃນໂຮງຮຽນ ຂອງຕົນ ໃຫ້ຮັກສາມາດຕະການໃນການປ້ອງກັນພະຍາດດັ່ງກ່າວຢ່າງເຂັ້ມງວດ ເປັນຕົ້ນແມ່ນ ການຮັກສາໄລຍະຫ່າງ ທາງສັງຄົມ, ໃສ່ຜ້າອັດປາກ-ອັດດັງທຸກຄັ້ງກ່ອນອອກຈາກເຮືອນ, ຫມັ່ນລ້າງມືໃສ່ສະບູ່ ຫຼື ເຈວລ້າງມື ໃຫ້ສະອາດ ແລະ ເປັນປະຈໍາ. ຖ້າຫາກມີການປ່ຽນແປງໃນໄລຍະນີ້ ຈະແຈ້ງຄືນພາຍຫຼັງ.
ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ຊ່ວຍແຈ້ງໄປຍັງບັນດາໂຮງຮຽນ ເພື່ອຈັດປະຕິບັດຢ່າງເຂັ້ມງວດ.