ບັນເທີງ

ເປັນແຟນກັນມາຫຼາຍປີ ແຕ່ເປັນຫຍັງສຸດທ້າຍແລ້ວກັບໄປກັນບໍ່ລອດ

ເປັນແຟນກັນມາຫຼາຍປີ ແຕ່ເປັນຫຍັງສຸດທ້າຍແລ້ວກັບໄປກັນບໍ່ລອດ

ເຄີຍເຊື່ອເລື່ອງເນຶ້ອຄູ່ບໍ່ ? ບາງຄົນກໍ່ຈະເຊື່ອ ບາງຄົນກະອາດຈະບໍ່ເຊື່ອ

ສຳລັບແອັດມິນກໍ່ເຊື່ອວ່າອາດຈະມີແທ້, ແຕ່ເນື້ອຄູ່ໃນທີ່ນີ້ກະອາດຈະເກີດຍ້ອນເຮົາເປັນຄົນກຳນົດເອງ.

ແອັດມີໝູ່ຢູ່ 2-3 ຄົນທີ່ແບບວ່າມີແຟນແຕ່ສະໃໝຮຽນຄົບກັນຈົນເຮັດວຽກເຮັດການມາຈົນຮອດ 10 ປີ ບາດແລ້ວຢູ່ດີໆກໍ່ເລີກກັນແບບງ່າຍໆ,ສຸດທ້າຍມີອີກຄົນເຂົ້າມາບໍ່ຮອດປີກໍ່ແຕ່ງງານກັນ. ບາງຄົນກໍ່ລົມກັນ 4-5 ປີ ແລ້ວສຸດທ້າຍກໍ່ມີເຫດໃຫ້ເລີກກັນແລ້ວກໍ່ໄປເຈິອີກຄົນບໍ່ພໍເທົ່າໃດເດືອນກໍ່ແຕ່ງກັນ. ບາງຄັ້ງບໍ່ໜ້າເຊື່ອກໍ່ເປັນຕາເຊື່ອໃດ.

ເຫັນມາຫຼາຍຄູ່ແລ້ວເລີຍອົດຂຽນບົດຄວາມບໍ່ໃຫວ, ຄຳວ່າເນື້ອຄູ່ ຕາມຄວາມເຊື່ອກະອາດຈະຍ້ອນຜູກດວງຊາຕາກັນມາແຕ່ຊາດກ່ອນ ແລ້ວເຮັດໃຫ້ຕ້ອງໄດ້ພົບຕ້ອງໄດ້ພົວກັນກັນຈົນເຮັດໃຫ້ມັກກັນແລະກໍ່ຕົກລົງໃຊ້ຊີວິດຮ່ວມກັນ. ໃນທາງວິທະຍາສາດກໍ່ເວົ້າວ່າ ຍ້ອນໂຕເຮົາ ແລະ ອີກຝ່າຍຍອມຮັບເຊິ່ງກັນແລະກັນ, ມີຄວາມຜູກພັນ ຫຼື ຈຸດທີ່ຄ້າຍຄືກັນ ດຶງດູດມາເຂົ້າກັນໄດ້ ກໍ່ເຮັດໃຫ້ເກີດເປັນຄວາມມັກຮັກ ຄວາມຜູກພັນກັນ.

ສຳລັບຄູ່ທີ່ຄົບກັນດົນໆແລ້ວເລີກລາກັນໄປ: ອາດຈະເປັນຍ້ອນວ່າ ຖ້າຄົບກັນດົນແລ້ວ ແລະ ແບບບໍ່ຮູ້ຈັກຫາຫຍັງໃໝ່ໆມາເຕີມເຕັມໃຫ້ກັນ, ບໍ່ມີຫຍັງຕື່ນເຕັ້ນ,ເຮັດແຕ່ແນວເກົ່າໆ ຄືເກົ່າຕະຫຼອດ ມັນກະອາດຈະເຮັດໃຫ້ເບຶ່ອກັນ, ອີກຢ່າງ ຄົບກັນດົນຫຼາຍ ອີກຝ່າຍຕ້ອງການສ້າງຄອບຄົວ, ແລະ ອີກຝ່າຍພັດບໍ່ພ້ອມ ມັນກໍ່ເຮັດໃຫ້ເລີກກັນໄປກໍ່ມີ. ແລະ ບາງທີຄົບກັນໄປເຫັນຈຸດເສຍຂອງກັນຫຼາຍ ແລະ ຮັບກັນບໍ່ໄດ້ ກໍ່ເຮັດໃຫ້ເບື່ອ ແລະ ເລີກກັນໄປກໍ່ມີ.

ເມື່ອຊວ່ງເວລາທີ່ເໝາະສົມ, ໃນຂະນະທີ່ເລີກກັນໄປແລ້ວ ແລະ ມີອີກຄົນເຂົ້າມາ ກໍ່ເຮັດໃຫ້ເບຶ່ອກັບການທີ່ຄົບກັນດົນໆ ແລ້ວບໍ່ໄດ້ຫຍັງ ແບບທີ່ເຄີຍເຈິ, ຈາກນັ້ນກະເລີຍເຮັດໃຫ້ມີສ່ວນໃນການຕັດສິນໃຈງ່າຍຂື້ນ ເມື່ອອີກຝ່່າຍກະພ້ອມເຊັ່ນກັນ, ສຸດທ້າຍກໍ່ຕົກລົງປົງໃຈກັນແຕ່ງງານກັນ.

ດັ່ງນັ້ນ,ເຮົາຈຶ່ງບໍ່ແປກໃຈເລີຍວ່າເປັນຫຍັງເຮົາຈຶ່ງເຫັນແບບນັ້ນ ແບບຄົບກັນໄປຫຼາຍປີພັດບໍ່ໄດ້ກັນ ບາດແລ້ວມາໄດ້ກັບຄົນທີ່ຄົບກັນບໍ່ຮອດປີກະມີ.

ສຸດທ້າຍແລ້ວ ຖ້າຄາດຈະເປັນເນື້ອຄູ່ກັນແທ້ ຈັ່ງໃດກະຕ້ອງໄດ້ກັນເອງດອກ, ອັນໃດທີ່ບໍ່ແມ່ນຂອງເຮົາຈະດຶງໄວ້ຊ່ຳໃດ ສຸດທ້າຍກະບໍ່ໄດ້ຫຍັງຢູ່ດີ.