ຂໍ້ຄິດ

ສາເຫດ ຄົບກັນມາຫຼາຍປີແຕ່ສຸດທ້າຍໄປກັນບໍ່ລອດ ເປັນຍ້ອນຫຍັງ ມາເບີ່ງວິທີຫາທາງອອກພ້ອມກັນ

ເປັນຫຍັງ ? ຄົບກັນມາບັກຫຼາຍໆປີ, ບາງຄູ່ 4-5 ປີ, ບາງຄູ່ກະ 7-8 ປີ.. ຫຼັງຈາກແຕ່ງງານກັນໄປບໍ່ພໍເທົ່າໃດເດືອນ ເສືອກໄປກັນບໍ່ລອດ ສຸດທ້າຍກະຕ້ອງແຍກທາງກັນ

ເຫັນຫຼາຍຄູ່ ທີ່ກຳລັງມີບັນຫາແນວນີ້, ຄົນອອ້ມຂ້າງ ບາງຄູ່ກໍ່ຈົນມີລູກນຳກັນແລ້ວ, ໄປກັນບໍ່ໄດ້ ກໍ່ເລີຍຕັດສິນໃຈເລີກລາກັນໄປກໍມີ ມານັ່ງຄິດເບິ່ງບັນຫາກໍ່ບໍ່ແມ່ນຂອງຝ່າຍໃດຝ່າຍໜຶ່ງ, ຕ້ອງໂທດທັງສອງເອງທີ່ເບິ່ງແຕ່ດ້ານດີກັນ, ບໍ່ເບິ່ງທັງສອງດ້ານຂອງອີກຝ່າຍ, ສຸດທ້າຍມາເຫັນກະຮັບບໍ່ໄດ້ ແລະ ເລີກລາກັນໄປ

ຂໍບອກເລີຍວ່າ ຊີວິດຄູ່ໃນຊວ່ງທີ່ເປັນແຟນກັບຊີວິດຄູ່ຫຼັງແຕ່ງງານກັນມັນເປັນໜັງຄົນລະມວ້ນກັນເລີຍເດີ້ ຂໍບອກ

ສົມມຸດງ່າຍໆ, ກະຄືກັບເຮົາຊື້ຫຍັງຈັກຢ່າງ, ສົມມຸດເນາະ, ຕ້ອງການຊື້ລົດຄັນໜຶ່ງ… ໂດຍທີ່ຕົນເອງວາງສະເປັກໄວ້ວ່າເປັນລົດເກັງ.. ແຕ່ບໍ່ໄດ້ເບິ່ງລະອຽດທີ່ຖ້ວນ, ບໍ່ໄດ້ສຶກສາຮອບຄອບ, ແລ້ວກໍ່ໄປເລາະເບິ່ງລົດເກງຕາມແຕ່ລະຮ້ານ, ໄປຮອດເຂົາກໍ່ໂຄສະນາ ໃຫ້ເບິ່ງວ່າເປັນແນວໃດ, ດ້ວຍຄວາມທີ່ບໍ່ໄດ້ເບິ່ງດ້ານເສຍຂອງມັນໄປນຳ, ເລີຍຕັດສິນໃຈຊື້.. ສຸດທ້າຍເວລາມາຂີ່ເອງເຮັດໃຫ້ຕົນເອງຮູ້ຫຼາຍໆຢ່າງວ່າມັນເປັນແນວໃດ ບາງຄົນຮັບບໍ່ໄດ້ຈົນເຖິງຂັ້ນຂາຍມັນອອກໄປ

ຊີວິດຄູ່ກໍ່ຄືກັນ, ດັ່ງທີ່ໄດ້ບອກໄປໃນຕອນຕົ້ນວ່າມັນໜັງຄົນລະມ້ວນ, ເອົາງ່າຍໆ ເວລາເປັນແຟນກັນ, ຊິຈັກປີກະຢ່າ, ທີ່ໄປກັນລອດກະຍອດມັນບໍ່ທັນໄດ້ແບກຮັບພາລະ, ຍິ່ງຄົນທີ່ບໍ່ມີຄວາມຮັບຜິດຊອບ ແລະ ບໍ່ມີຄວາມອົດທົນແຮ່ງຈະໄປກັນໃຫ່ຍ່. ເມື່ອບໍ່ມີພາລະຫຍັງ ມັນກະເລີຍບໍ່ສະແດງຫຍັງອອກມາໃຫ້ເຫັນ, ຍັງຄົງເປັນເສືອທີ່ຍັງບໍ່ມີລາຍ, ຍັງງົງບໍ່ ? ຖ້າງົງ ຂໍເວົ້າເປັນຕົວຢ່າງງ່າຍໆຄື: ເວລາເປັນແຟນກັນສ່ວນໃຫ່ຍ ຈະມີແຕ່ໄປກິນເຂົ້າ, ໄປເບິ່ງໜັງ, ໄປຫຼິ້ນນຳກັນ, ໄປ ທຳບຸນໃສ່ບາດ, ໄປບ່ອນນັ້ນບ່ອນນີ້ຊື່ໆ ແມ່ນບໍ່ລະ ? ເຄີຍຢູ່ນຳກັນຄົບ 24 ຊົ່ວໂມງຈັກມື້ລະ ? ແມ່ນຢູ່ວ່າຄົບກັນຫຼາຍປີ ກະຮູ້ນິໃສໃຈຄໍ ແຕ່ຍັງຂາດທີ່ບໍ່ທັນຮູ້ຊີວິດຫຼັງຈາກມີພາລະແລ້ວ

– ຫຼັງແຕ່ງງານ ກາຍເປັນໜັງຄົນລະມ້ວນກັນລະ, ກາຍເປັນຄົນທີ່ບໍ່ໄດ້ຢູ່ໂຕຄົນດຽວລະ, ກາຍເປັນຄົນມີພາລະ, ໃນຈຸດໆນີ້ ຖ້າຕ່າງຝ່າຍຕ່າງຊ່ວຍສ້າງຊ່ວຍສາ, ຊ່ວຍປະຄັບປະຄອງກັນໃຫ້ລອດໃນຊວ່ງຕອນຕົ້ນກະຖືວ່າລອດໄປ

ເພາະວ່າຊວ່ງນີ້ຖືເປັນຊວ່ງວິກິດສຸດ ເພາະຕ່າງຝ່າຍຕ່າງເຄີຍຢູ່ຄົນດຽວ, ຢູ່ນຳພໍ່ແມ່, ບາດແລ້ວຊີວິດປ່ຽນ ຕ້ອງມາໃຊ້ຊີວິດແບບຄູ່ແນວນີ້ ກໍ່ຕ້ອງໃຊ້ເວລາປັບໜ້ອຍໜຶ່ງ

ແຕ່ເມື່ອຝ່າຍໜຶ່ງ, ບໍ່ຍອມປັບປ່ຽນຊີວິດ, ຍັງຄົງໃຊ້ຊີວິດເດີມໆຄືທີ່ຕົນເຮັດ, ເຄີຍໄປຫຼິ້ນ, ໄປກິນ ກະໄປຄືເກົ່າ, ບາງຄູ່ ຝ່າຍໜຶ່ງຫາເງິນຝ່າຍດຽວ, ກັບມາບ້ານ ອີກຄົນບໍ່ເຮັດຫຍັງ, ນັ່ງກິນນອນກິນ, ວຽກເຮືອນກໍ່ບໍ່ເຮັດຊ້ຳ ກໍ່ເລີຍອາດຈະເຮັດໃຫ້ມີປາກມີສຽງກັນ, ແລ້ວຊີວິດຄູ່ຈະມີລາຍຈ່າຍເພີ່ມຂື້ນຫຼາຍເທົ່າ ຄື: ຄ່ານ້ຳ, ຄ່າໄຟ, ຄ່າອອກຕະຫຼາດ,ຄ່າກິນຄ່າຢູ່ໄປແຕ່ລະມື້ອີກ, ຍິ່ງຖ້າມີລູກ ແລ້ວຍິ່ງຄັກ, ຄ່າໃຊ້ຈ່າຍແຮ່ງເພິ່ມຂື້ນຫຼາຍເທົ່າ ເມື່ອມີຄ່າໃຊ້ຈ່າຍເພີ່ມຂື້ນຊີວິດຄວາມຫວານແຫວວຄືແຕ່ສະໃໝເປັນແຟນກັນມັນກໍ່ຈາງຫາຍໄປເທື່ອລະໜ້ອຍ, ສຸດທ້າຍ.. ກໍ່ອາດຈະເຮັດໃຫ້ໄປກັນບໍ່ລອດ

ຫຼືອີກກໍລະນີໜຶ່ງ ຕ່າງຝ່າຍຕ່າງມີພຽບພ້ອມແລ້ວ, ມາເອົາກັນກໍ່ບໍ່ໄດ້ສົນຫຍັງກັບເລື່ອງຄ່າໃຊ້ຈ່າຍ, ແຕ່ຍັງຕິດນິໃສຕິດຫຼິ້ນຕິດກິນ ຄືສະໃໝຍັງໂສດ, ຍັງໄປຢອກໄປຫົວ, ບາງຄົນກະຈົນລືມໂຕ, ຢາກອອກໄປທາງຫຼາຍໃຈກໍມີ, ແຕ່ກີ້ຕອນຄົບກັນຍັງບໍ່ໄດ້ຢູ່ນຳກັນ 24 ຊົ່ວໂມງຫຼາຍມື້, ແຕ່ພໍມາຢູ່ນຳກັນແລ້່ວ ເຫັນການເຄື່ອນໄຫວ ເຫັນທຸກໆຢ່າງກໍ່ເຮັດໃຫ້ເບື່ອໄປເອງ ແລະ ເລີກລາກັນໄປກະມີ.

ວິທີຫາທາງອອກ ກໍຄື : ບໍ່ມີທາງອອກຖ້າຕ່າງຝ່າຍຕ່າງບໍ່ປັບ, ຕ່າງຝ່າຍຕ່າງບໍ່ຖອຍ, ທາງທີ່ດີທີ່ສຸດຄືຕ່າງຄົນຕ່າງຍອມ ແລະ ຜ່ານຜ່າອຸປະສັກໄປດ້ວຍກັນ, ແລະ ອົດທົນກັນໃຫ້ຫຼາຍຂື້ນ ຈະເປັນທາງອອກທີ່ດີທີ່ສຸດ ຂໍເອົາໃຈຊ່ວຍໃຫ້ຄົນທີ່ກຳລັງມີບັນຫາດ້ານນີ້ ໃຫ້ຜ່ານຜ່າຈຸດນີ້ໄປໂດຍດີ.

ຂໍຂອບໃຈພາບປະກອບບົດຄວາມຈາກ ຄູ່ຮັກດາລາໄທ ເລີກກັນໃນປີທີ່ຜ່ານມາ