ຂ່າວ

ລັດຖະບານ​ ມອບພາຫະນະ (ລົດຈັກ) ຮັບໃຊ້ວຽກງານຄຸ້ມຄອງພົນລະເມືອງໃຫ້ ແຂວງອັດຕະປື 6 ຄັນ

ລັດຖະບານ​ ມອບພາຫະນະ (ລົດຈັກ) ຮັບໃຊ້ວຽກງານຄຸ້ມຄອງພົນລະເມືອງໃຫ້ ແຂວງອັດຕະປື 6 ຄັນ

ໃນວັນທີ​ 26 ທັນວາ​ 2020​ ນີ້ລັດຖະບານ​ ກໍ່ຄືກະຊວງພາຍໃນ ໄດ້ມອບພາຫະນະປະເພດລົດຈັດຈໍານວນ 6​ ຄັນ,​ມູນຄ່າ 108 ລ້ານກວ່າກີບ,​ໃຫ້ແຂວງອັດຕະປື​ ເພື່ອນໍາໃຊ້ພາຫະນະດັ່ງກ່າວເຂົ້າໃນວຽກງານຄຸ້ມຄອງພົນລະເມືອງພາຍໃນແຂວງ ໂດຍສະເພາະວຽກງານຈົດຖະບຽນ ແລະ​ ສະຖິຕິພົນລະເມືອງ,ໃນນີ້ໄດ້ມອບໃຫ້ຂະແໜງຄຸ້ມຄອງພົນລະເມືອງພະແນກພາຍໃນແຂວງອັດຕະປື ຈໍານວນ​ 1​ຄັນ​ ແລະ​ ມອບໃຫ້ໜ່ວຍງານຄຸ້ມຄອງພົນລະເມືອງ 5​ ຕົວເມືອງພາຍໃນແຂວງອີກ ເມືອງລະ 1​ ຄັນ.

ພິທີມອບ-ຮັບພາຫະນະດັ່ງກ່າວໄດ້ຈັດຂື້ນທີ່ຫ້ອງວ່າການປົກຄອງ ແຂວງອັດຕະປື,​ກ່າວມອບໂດຍ ທ່ານ ວັນດີ ຈັນທະລິເດດ ຮອງຫົວໜ້າກົມຄຸ້ມຄອງພົນລະເມືອງ ກະຊວງພາຍໃນ​ ແລະ​ ກ່າວຮັບໂດຍ ທ່ານ ບຸນທະມະລີ ໝັ້ນອານົງ ຫົວໜ້າພະແນກພາຍໃນ ແຂວງອັດຕະປື,​ໂດຍຊ້ອງໜ້າພາກສ່ວນທີ່ກ່ຽວຂ້ອງເປັນສັກຂີພິຍານ.​

ທ່ານ​ ວັນດີ ຈັນທະລິເດດ ຮອງຫົວຫນ້າກົມຄຸ້ມຄອງພົນລະເມືອງ ກະຊວງພາຍໃນ ໄດ້ກ່າວມີຄຳເຫັນໃນການມອບ-ຮັບລົດຈັກຄັ້ງນີ້ວ່າ: ພາຫະນະລົດຈັກທີ່ກະຊວງພາຍໃນມອບໃຫ້ແຂວງອັດຕະປື ຄັ້ງນີ້ກໍ່ເພື່ອແນໃສ່ອຳນວຍຄວາມສະດວກໃຫ້ແກ່ຂັ້ນທ້ອງຖິ່ນໃນການເຄື່ອນໄຫວຈັດຕັ້ງປະຕິບັດວຽກງານໂຄງການຈົດທະບຽນ ແລະ ສະຖິຕິພົນລະເມືອງ ວຽກງານຄຸ້ມຄອງພົນລະເມືອງໃຫ້ມີຄຸນນະພາບ ບັນລຸໄດ້ຕາມຈຸດປະສົງ ແລະ ຄາດໝາຍທີ່ກຳນົດໄວ້ ສະນັ້ນລັດຖະບານຈື່ງໄດ້ອອກອະນຸມັດໃຫ້ກະຊວງພາຍໃນເປັນຜູ້ຈັດຊື້,​ເຊິ່ງທົ່ວປະເທດມີທັງໝົດຈຳນວນ 168 ຄັນ,​ດ້ວຍທືນກູ້ຢືມຈາກທະນາຄານໂລກ ເພື່ອມອບໃຫ້ຂະແໜງຄຸ້ມຄອງພົນລະເມືອງຢູ່ແຂວງ ແລະເມືອງໃນທົ່ວປະເທດ,​ສຳລັບແຂວງອັດຕະປື ມີຈຳນວນ 6​ຄັນ,​ມູນຄ່າ​ 108 ລ້ານກວ່າກີບ.​

ໂອກາດດັ່ງກ່າວທ່ານ ບຸນທະມາລີ​ ໝັ້ນອານົງ​ ຫົວໜ້າພະແນກພາຍໃນແຂວງອັດຕະປື,​ ໄດ້ກ່າວສະແດງຄວາມຂອບໃຈມາຍັງລັດຖະບານ ກໍ່ຄືກະຊວງພາຍໃນ ທີ່ໄດ້ສະໜອງພາຫະນະຮັບໃຊ້ ໃຫ້ທ້ອງຖິ່ນ​ ເພື່ອຮັບໃຊ້ວຽກງານຄຸ້ມຄອງພົນລະເມືອງພາຍໃນແຂວງອັດຕະປື ແລະ​ ໃຫ້ຄໍາໝັ້ນສັນຍາວ່າຈະນໍາໃຊ້ພາຫະນະດັ່ງກ່າວນີ້ໃຫ້ເກີດປະໂຫຍດສູງສຸດ.

Attapeumedia
ຂ່າວ: ສິດຕິພອນ ສຸວັນນະວົງ