ຂໍ້ຄິດ

ຢາກໃຫ້ທ່ານໄດ້ອ່ານບົດຄວາມນິ້ ! ຊີວິດຄູ່ ຢ່າຮູ້ໂຕເມື່ອມາສາຍເກິນໄປ ດ່ຽວຈະເສຍໃຈທີ່ຫຼັງ

ຢາກໃຫ້ທ່ານໄດ້ອ່ານບົດຄວາມນິ້ ! ຊີວິດຄູ່ ຢ່າຮູ້ໂຕເມື່ອມາສາຍເກິນໄປ

ສຳລັບຄົນມີຄູ່ເຖິງວ່າຈະເປັນໄດ້ພຽງແຕ່ແຟນຍັງບໍ່ແຕ່ງດອງກໍຕາມ ລອງມາເບິ່ງເລື່ອງຊີວິດຂອງໜຸ່ມສາວຄູ່ໜຶ່ງ ທີ່ເຂົາມີເມຍເປັນຄົນຂີ້ຮ້າຍວ່າຜູ້ຊາຍຄົນນັ້ນຈະເຮັດແນວໃດ ເມື່ອເມຍໜ້າຕາບໍ່ງາມ ຢາກໃຫ້ເປັນອຸທາຫອນ ຢ່າເຮັດຫຍັງແບບບໍ່ຄິດ ແລະ ໄປຮູ້ໂຕ ເມື່ອມັນສວາຍໄປເສຍແລ້ວ.

ເຂົາເລີ່ມຈາກການອອກໄປເຮັດວຽກເປັນຊ່າງປູນຈົນໆຄົນໜື່ງ ແລະ ຄ່ອຍໆ ໄດ້ເລື່ອນເປັນຫົວໜ້າຊ່າງປູນໃນເວລາຕໍ່ມາເຂົາກໍ່ໄດ້ສ້າງຕັ້ງບໍລິສັດຮັບເໝົາກໍ່ສ້າງ ເຊິ່ງໃນຂະນະນີ້ບໍລິສັດກໍ່ສ້າງຂອງເຂົາເປັນບໍລິສັດທີ່ມີຊື່ສຽງພໍສົມຄວນ ແລະ ນີ້ກໍ່ແມ່ນຈຸດເລີ່ມຕົ້ນໃຫ້ເກີດສິ່ງລໍ້ຕາລໍ້ໃຈ.

ເມຍຂອງຊ່າງປູນຈົນໆຄົນນີ້ ຄອຍເບິ່ງແຍງຜົວມາຕະຫຼອດຫຼາຍປີ ຈາກຫຸ່ນທີ່ຈ່ອຍງາມ ກໍ່ເລີ່ມຕຸ້ຍ, ຜິວພັນທີ່ນຽນນຸ່ມກໍ່ເລີ່ມແຫ່ວລົງທຸກມື້, ເຮັດໃຫ້ຊ່າງປູນຮູ້ສືກບໍ່ດີເມື່ອເອົາເມຍຕົນເອງໄປທຽບໃສ່ເມຍຄົນອື່ນ, ລັກສະນະຮູບຮ່າງຂອງເມຍເຮັດໃຫ້ເຂົາຮູ້ສຶກເບື່ອ ແລະ ເມື່ອເຫັນເມຍ ເຂົາກໍ່ຄິດເຖິງແຕ່ເລື່ອງໃນອາດີດຊ່ວງຊີວິດທີ່ເຂົາລຳບາກ ແລະ ຍາກຈົນ.

ເຂົາຄິດວ່າຊີວິດຂອງຄູ່ເຂົາທັງສອງຄວນຈະຢຸດລົງໄດ້ແລ້ວ ເຂົາຝາກເງິນໃນບັນຊີໃຫ້ເມຍ 100 ລ້ານຢວນ ພຽງພໍຕໍ່ການຊື້ເຮືອນໃໝ່ໃນເມືອງ, ເຂົາບໍ່ແມ່ນຜູ້ຊາຍທີ່ບໍ່ມີຄວາມຮັບຜິດຊອບ, ເຂົາວາງແຜນຊີວິດໃນອະນາຄົດຂອງເມຍເຂົາໄວ້, ຫາກວ່າບໍ່ເຮັດແບບນີ້ຈະເຮັດໃຫ້ເຂົາຮູ້ສຶກບໍ່ດີ ບໍ່ຢາກໃຫ້ເມຍເຂົາລຳບາກ…. ໃນທີ່ສຸດເຂົາກໍ່ຂໍຮ້າງກັບເມຍ.

ເມຍ ຮັບຟັງຂໍ້ສະເໜີຂອງເຂົາດ້ວຍແວວຕາທີ່ສະຫງົບ ແລະ ຖ່ອມຕົນ ເມື່ອເຖິງເວລາທີ່ເມຍລາວຕ້ອງຍ້າຍອອກໄປຢູ່ເຮືອນທີ່ຜົວຊື້ໄວ້ໃຫ້ແລ້ວ ຊ່ວງຕອນສວາຍເຂົາກໍກັບມາຊ່ວຍເມຍຍ້າຍເຮືອນ ແລະ ເປັນການຢຸດໃນການໃຊ້ຊີວິດຮ່ວມກັນມາ 20 ​ກວ່າປີ.

ຕະຫຼອດຊ່ວງທີ່ເຂົາເຮັດວຽກ ດ້ວຍຈິດໃຈທີ່ວຸ້ນວາຍ ພໍເຖິງຕອນບ່າຍເຂົາຮີບກັບເຮືອນກໍພົບວ່າເມຍໄດ້ອອກຈາກເຮືອນໄປແລ້ວ, ເມຍວາງກະແຈເຮືອນທີ່ເຂົາຊື້ໃຫ້ກັບປື້ມບັນຊີທີ່ຝາກໄວ້ໃຫ້ຈຳນວນ 100 ລ້ານຢວນ ພ້ອມກັບຈົດໝາຍທີ່ຂຽນຂໍ້ຄວາມໄວ້ວ່າ: ຂ້ອຍໄປແລ້ວເດີ ຂ້ອຍຈະກັບໄປເຮືອນແມ່ຂ້ອຍ, ຜ້າປູເສື່ອນອນຊັກແລ້ວ ແລະ ຕາກແຫ້ງຮຽບຮ້ອຍ ຂ້ອຍພັບເກັບໄວ້ໃນຫ້ອງເກັບໂຕະມຸມຂວາຂອງຕູ້ ຖ້າອາກາດໜາວຢ່າລືມເອົາອອກມາໃຊ້.

ເສື້ອເຊີດແຂນສັ້ນຢູ່ໃນຕູ້ເສື້ອຜ້າ, ຖົງຕີນ, ເຂັມຂັດເກັບໄວ້ໃນຕູ້ຊັ້ນລຸ່ມຂອງຕູ້ເສື້ອຜ້າ, ຫຼັງຈາກທີ່ຂ້ອຍອອກໄປແລ້ວຢ່າລືມກິນຢາ, ກະເພາະເຈົ້າບໍ່ຄ່ອຍດີ, ຂ້ອຍຝາກໝູ່ຂ້ອຍຊື້ຢາໃຫ້ເຈົ້ານ່າຈະພໍກິນເຖິງເຄິ່ງປີ.

ສຸດທ້າຍ ມີອີກເລື່ອງໜື່ງ ເຈົ້າມັກລືມກະແຈເຮືອນເປັນປະຈຳ ຂ້ອຍໄດ້ຝາກກະແຈສຳຮອງໄວ້ທີ່ປ້ອມຍາມ ຖ້າລືມກໍ່ໄປເອົາທີ່ປ້ອມຍາມໄດ້.

ຕອນເຊົ້າອອກໄປເຮັດວຽກຢ່າລືມປີດປ່ອງຢ້ຽມ ເພາະຖ້າຝົນຕົກຈະສາດເຂົ້າເຮືອນເຮັດໃຫ້ພື້ນເຮືອນປຽກ ແລະ ເສຍໄດ້, ຂ້ອຍເຮັດກ້ຽວທີ່ເຈົ້າມັກຢູ່ໃນຫ້ອງຄົວ, ຖ້າກັບເຮືອນມາກໍ່ຕົ້ມກິນເອງເດີ

ໂຕໜັງສືຂອງເມຍລາວໃນຈົດໝາຍຂຽນຂີ້ຮ້າຍຫຼາຍ ແຕ່ໂຕໜັງສືທຸກໂຕສະແດງເຖິງຄວາມຈິງໃຈສຸດຊື້ງ ເຮັດໃຫ້ເຂົາຮູ້ສຶກມີເຂັມມາແທງຫົວໃຈ, ເຂົານັ່ງເບິ່ງກ້ຽວທີ່ຫໍ່ເກັບໄວ້ໃຫ້ເຂົາ, ເຂົາກໍ່ນຶກຍ້ອນໄປເມື່ອ 20 ​ປີກ່ອນ ທີ່ຊ່າງປູນຈົນໆຄົນໜື່ງ ຄິດຮອດສ່ຽງຊອຍຜັກທີ່ກຽມຫໍ່ກ້ຽວໃຫ້ເຂົາ, ເຮັດໃຫ້ເຂົາມີຄວາມສຸກ ແລະ ສັນຍາກັບໂຕເອງວ່າ: ເຂົາຈະເຮັດໃຫ້ຜູ້ຍິງຄົນນີ້ມີຄວາມສຸກທີ່ສຸດ.

ເຂົາຮີບຂັບລົດອອກໄປຊອກຫາເມຍທັນທີ ຫຼັງຈາກນັ້ນເຄີ່ງຊົ່ວໂມງກໍພົບເມຍທີ່ສະຖານີລົດໄຟ ຮ່າງກາຍເຂົາເຕັມໄປດ້ວຍເຫື່ອ ເຂົາເວົ້າຂື້ນດ້ວຍຄວາມໃຈຮ້າຍວ່າ: ເຈົ້າຊິໄປໃສ ຂ້ອຍຫາກໍເລີກວຽກ ເມື່ອຍມາໝົດມື້ ກັບເຮືອນຍັງບໍ່ໄດ້ກິນເຂົ້າ ໜ້າທີ່ເມຍຄວນເຮັດແບບນີ້ບໍ່?  ກັບເມືອເຮືອນພ້ອມຂ້ອຍດຽວນີ້.

ເມຍຂອງເຂົານໍ້າຕາຍິ່ງປໍ້ ຄ່ອຍລຸກຂື້ນ ແລະ ຍ່າງຕາມຫຼັງເຂົາໄປ ຈາກຮອຍນໍ້າຕາກາຍມາເປັນຮອຍຍິ້ມ ແຕ່ລາວບໍ່ຮູ້ວ່າຜົວຂອງລາວຮ້ອງໄຫ້ຫຼາຍກວ່າ… ຊ່າງປູນຢ້ານຫຼາຍໃນຂະນະທີ່ຂັບລົດມາທີ່ສະຖານີລົດໄຟ, ເຂົາຢ້ານທີ່ຈະຫາເມຍບໍ່ເຫັນ ຢ້ານທີ່ຈະສູນເສຍເມຍໄປຕະຫຼອດຊີວິດ.

ເຂົາດ່າ ແລະ ໂທດໂຕເອງວ່າ ເປັນຫຍັງຄືເປັນຄົນໂງ່ແບບນີ້ ຖິ້ມຜູ້ຍິງທີ່ເຂົາຮັກ ຜູ້ຍິງທີ່ຢູ່ຮ່ວມທຸກຮ່ວມສຸກກັນມາ 20 ປີ ເຊີ່ງມັນກາຍເປັນສ່ວນໜຶ່ງຂອງຊີວິດໄປແລ້ວ.

ຄວາມສຸກທີ່ແທ້ຈິງບໍ່ແມ່ນຈຳນວນເງິນໃນປື້ມບັນຊີ ແຕ່ມັນຄືຮອຍຍີ້ມຈາກຄົນທີ່ຮັກ ແມ່ນບໍ່ທ່ານຜູ້ອ່ານ, ຫາກທ່ານຍັງມີຄົນທີ່ຮັກຢູ່ຈົ່ງຖະໜອມນ້ຳໃຈເຂົາໄວ້ ແລະໃຫ້ຄິດເຖິງຕອນທີ່ລຳບາກມາດ້ວຍກັນ ທຸກສ່ຳໃດເຂົາຍັງທົນນຳ

ແລ້ວເຫດໃດຕອນສະບາຍແລ້ວລືມຄົນທີ່ທົນທຸກຮ່ວມກັນມາ, ຄົນທີ່ຍອມລຳບາກມານຳກັນເທົ່ານັ້ນທີ່ຮັກທ່ານຢ່າງຈິງໃຈ.

#ໝາຍເຫດຮູບພາບເປັນພຽງພາບປະກອບບົດຄວາມເທົ່ານັ້ນ.