ຂ່າວ

ພິທີຕຶກເບັດ ທີມທະຫານເມືອງໄຊເສດຖາ ພິຊິດປາ 6 ກວ່າກິໂລຄວ້າແຊັມຕຶກເບັດ ທີ່ບຶງທາດຫຼວງ

ພິທີຕຶກເບັດ ທີມທະຫານເມືອງໄຊເສດຖາ ພິຊິດປາ 6 ກວ່າກິໂລຄວ້າແຊັມຕຶກເບັດ ທີ່ບຶງທາດຫຼວງ

ພິທີຕຶກເບັດໄດ້ຈັດຂຶ້ນວັນທີ 23 ມັງກອນ 2021 ທີ່ ບຶງທາດຫຼວງ ເຂົ້າຮ່ວມຂອງທ່ານ ໂພຄໍາ ໄຊຍະສອນ ເຈົ້າເມືອງໄຊເສດຖາ, ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດນະຄອນຫຼວງວວຽງຈັນ; ມີຄະນະຄຸ້ມຄອງເຂດ ພ້ອມດ້ວຍພາກລັດ ທຸລະກິດ ແລະ ອໍານາດການປົກຄອງບ້ານ 48 ບ້ານເມືອງໄຊເສດຖາເຂົ້າຮ່ວມ.

ທ່ານ ທະນົງໄຊ ຄຸດໄພທູນ ກ່າວວ່າ: ກິດຈະກໍາຄັ້ງນີ້ເປັນຄັ້ງທີ 1 ຈັດຂຶ້ນເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ, ສ້າງຂະບວນການກິດຈະກໍາໃນເຂດເສດຖະກິດບຶງທາດຫຼວງໃຫ້ມີຫຼາກຫຼາຍສີສັນ ໂດຍສະເພາະຕາມແຜນພັດທະນາສີຂຽວ ແລະ ຍືນຍົງ. ກິດຈະກໍາດັ່ງກ່າວ ມີຜູ້ເຂົ້າຮ່ວມຈາກອົງການຈັດຕັ້ງຕ່າງໆ, ຄະນະບ້ານໃນເມືອງໄຊເສດຖາ ແລະ ອ້ອມຂ້າງ ນໍາເບັດເຂົ້າມາແຂ່ງຂັນ 200 ຄັນ.

ການແຂ່ງຂັນເລີ່ມແຕ່ເວລາ 7:00 – 12:00 ໂມງ ແຕ່ລະທີມໄດ້ງັດສູດເດັດຂອງເຫຍື້ອໃນການເກືອປາ ແລະ ໃສ່ເບັດ ເຊິ່ງປາກົດວ່າຜູ້ຊະນະເລີດເປັນທີມທະຫານເມືອງໄຊເສດຖາ ນະຄອນຫຼວງວຽງຈັນ ຕຶກໄດ້ປາ ເກັດແລບນໍ້າໜັກ 6,1 ກີໂລ ໄດ້ຮັບເງິນລາງວັນ 1 ລ້ານກີບພ້ອມຂັນ 1 ໜ່ວຍ; ລາງວັນ ທີ 2 ທີມທະຫານເມືອງໄຊເສດຖາ ນະຄອນຫຼວງວຽງຈັນ ອີກໜຶ່ງທີມ ຕຶກໄດ້ປາ ເກັດແລບ ນໍ້າໜັກ 4 ກິໂລ ໄດ້ຮັບເງິນລາງວັນ 7 ແສນກີບພ້ອມຂັນ 1 ໜ່ວຍ; ລາງວັນທີ 3 ແມ່ນທີມຈາກຄະນະຄຸ້ມຄອງເຂດເສດຖະກິດພິເສດ ຕຶກໄດ້ປາດຸກນໍ້າໜັກ 0,5 ກີໂລ ໄດ້ຮັບເງິນ 4 ແສນກີບພ້ອມຂັນລາງວັນ.

ທີ່ມາ : ຂ່າວເສດຖະກິດ-ການຄ້າ