ຂໍ້ຄິດ

ຜູ້ຊາຍດີເກີນໄປມັກຖືກປະຕິເສດ ມັນແມ່ນແທ້ບໍ່ ?

ເຄີຍໄດ້ຍິນທິດສະດີທີ່ວ່າ ເລີກກັນຍ້ອນຄຳວ່າດີເກີນໄປ, ຫຼື ທິດສະດີທີ່ວ່າ ຜູ້ຍິງມັກຄົນຊົ່ວ ນັ້ນບໍ່? ຫຼື ມັນຈະເປັນຄວາມຈິງ ? ຫຼື ຜູ້ຊາຍດີເກີນໄປນັ້ນມາດຕະຖານສູງເກີນໄປ ຈົນເຮັດໃຫ້ບໍ່ພໍດີກັບຜູ້ຍິງ ? ມື້ນີ້ເຮົາມາຮູ້ກັບບຸກຄົນປະເພດນີ້ກັນ.

ບາຍຄົນຄົງເຄີຍເປັນຄົນແບບນີ້ຄືກັນ, ຄືເຮົາພະຍາຍາມເຮັດໃຫ້ດີທີ່ສຸດ ແລະ ບໍ່ຢາກອົກຫັກ ແລະ ເຈັບຫຼາຍ, ແລ້ວກໍ່ບໍ່ຢາກເສຍເຂົາໄປ ເລີຍພະຍາຍາມດຶງໄວ້ໄດ້,ສຸດທ້າຍການທີ່ເຮົາພະຍາຍາມນັ້ນ ມັນເຮັດໃຫ້ເຮົາບໍ່ຮູ້ໂຕວ່າເຮົາເຮັດຫຼາຍເກີນໄປ ຈົນເຮັດໃຫ້ຖືກບອກເລີກໃນທີ່ສຸດ.

ຕອນທຳອິດເປັນ, ກໍ່ຄິດວ່າອາດຈະຍ້ອນຖືກຜູ້ຍິງທີ່ບໍ່ມັກຜູ້ຊາຍແບບນີ້, ອາດຈະຍັງມີຜູ້ຍິງທີ່ມັກນິໃສແບບນີ້ຢູ່, ແຕ່ມາສັງເກດນັ່ງທົບທວນດີໆແລ້ວ, ສິ່ງທີ່ເຮົາຜິດຫວັງ ມາຕະຫຼອດນັ້ນ, ກະບໍ່ໂທດເຂົາຝ່າຍດຽວ, ເຮົາເອງກໍ່ມີສ່ວນຜິດທີ່ເຮັດໂຕບໍ່ພໍດີ, ແລະ ແອັດມິນເອງກໍ່ອົກຫັກຕະຫຼອດຍ້ອນເຫດຜົນແບບເກົ່ານັ້ນລະ, ເລີຍຕັດສິນໃຈເປີດໃຈຜູ້ຍິງ ໄດ້ຖາມໄດ້ໂອ້ລົມກັບຫຼາຍຄົນ ຈົນໃນທີ່ສຸດກໍ່ສາມາດມາສະຫຼຸບລວມໆ ໃຫ້ຟັງໄດ້ດັ່ງນີ້:

1. ຜູ້ຊາຍ ດີເກີນໄປ ມັກເກັ່ງທຸກໆເລື່ອງ : ແບບເຂົາຍັງບໍ່ທັນມີໂອກາດອ້າປາກເວົ້າ, ເຮົາກໍ່ຮູ້ກ່ອນແລ້ວວ່າລາວຈະເວົ້າຫຍັງ, ແກ້ໂຕຫຍັງ. ແລະ ມັກຈະບໍ່ຟັງຄຳເຫັນ, ແລະ ປະຕິເສດແນວຄິດກັບຄຳເວົ້າຂອງຝ່າຍຍິງ. ບາງຄັ້ງຜູ້ຊາຍອາດເຈຕະນາ ໃຫ້ຝ່າຍຍິງປະທັບໃຈຕົນ, ແຕ່ເມື່ອມາຟັງຄຳຄິດເຫັນຝ່າຍຍິງແລ້ວ, ຜູ້ຍິງສ່ວນໃຫ່ຍມັກຈະອຶດອັດ, ແລະ ມັກຈະມັກຜູ້ຊາຍທີ່ມັກຮັບຟັງເຂົາຫຼາຍກວ່າຈະມາຕັດບົດກັນແນວນີ້.

2. ຜູ້ຊາຍ ດີເກີນໄປ ມັກຈະໄຊ້ສະໝອງຫຼາຍ ຈົນລືມຂ້າມຄວາມຮູ້ສຶກ : ຄືຍົກຕົວຢ່າງ: ໄປເບິ່ງໜັງ, ຂໍເລືອກເປັນໜັງແອັກຊັນ, ໜັງມັນໆ ສູ້ກັນຍິງກະໜ່ຳ… ຄຸ້ມຄ່າກວ່າມາເບິ່ງໜັງໂຣແມນຕິກ ຄວາມຮັກ ອີ່ຫຍັງແບບທຳມະດາ. ຫຼື ພາໄປຮ້ານອາຫານ ກໍ່ພາໄປຮ້ານທີ່ໂຕເອງມັກ, ແລະ ຄິດວ່າຜູ້ຍິງຈະມັກນຳ. ຄືບາງຄັ້ງຜູ້ຍິງຈະມັກໄປຮ້ານທີ່ຕ້ອງການພຽງບັນຍາກາດ, ກິນແນວເບົາໆ, ເຄັກ, ເຂົ້າໜົມ, ກາເຟ.. ແຕ່ຝ່າຍຜ້ຊາຍຄິດໃນໃຈແລ້ວວ່າບໍ່ຄຸ້ມຄ່າກັບເງິນທີ່ເສຍໄປ, ແຖມຍັງກິນບໍ່ອິ່ມທ້ອງອີກ.

3. ຜູ້ຊາຍ ດີເກີນໄປ ສ່ວນຫຼາຍມັກຂີ້ຫຶງ ກັບ ຂີ້ງອນ : ສວ່ນໃຫ່ຍຜູ້ຊາຍປະເພດນີ້ ມັກຈະໃຈນ້ອຍ, ຂີ້ຫຶງ, ຂີ້ງອນ… ແບບວ່າຢາກເຫັນໜ້າ, ຢາກຍິນສຽງ, ຢາກແຊັດນຳຕະຫຼອດເວລາ, ເວລາຝ່າຍຍິງອອກໄປຫຼີ້ນສ້າງສັນກັບໝູ່ ກໍ່ຢາກຈະໂທນຳ, ແຊັດນຳຕະຫຼອດ ຍ້ອນຢ້ານຄົນມາຈີບ ຈົນເຮັດໃຫ້ເຮົາເສຍຄະແນນໄປ.

ຍອມຮັບວ່າທີ່ເຮັດໄປກະຍ້ອນຮັກຫຼາຍ, ແລະ ບໍ່ຢາກເສຍເຈົ້າໄປ. ແຕ່ບາງຄັ້ງກະຈົນລືມຄິດເບິ່ງວ່າເຮົາເຮັດກາຍຄຳວ່າພໍດີ, ຈົນເປັນຄຳວ່າ ຫຼາຍເກີນໄປ. ແລະ ໃນຄວາມຄິດຂອງຜູ້ຍິງເລີຍຄິດວ່າ ມັນເກີນໄປ ທັ້ງໆທີ່ບາງຄົນຍັງບໍ່ໄຊ້ຄຳວ່າແຟນນຳກັນຊ້ຳ, ເລີຍເຮັດໃຫ້ຜູ້ຍິງສ່ວນໃຫ່ຍບໍ່ມັກໃນຈຸດນີ້.

4. ຜູ້ຊາຍ ດີເກີນໄປ ມັກຈະບໍ່ບອກຄວາມຕ້ອງການຂອງຕົນເອງ.ແບບວ່າ ຖາມວ່າໄປໃສ, ກິນຫຍັງ, ວາເລນທາຍສ ນີ້ຈະເຮັດຫຍັງ, ບຸນປີນີ້ຈະໄປຫຼີ້ນໃສ… ຝ່າຍຊາຍຕອບມາວ່າ: ແລ້ວແຕ່ເຈົ້າເດີ້, ໄປໃສກະໄດ້… ທີ່ຕອບແນວນີ້ກະຍ້ອນຢ້ານວ່າ ຝ່າຍຍິງຈະບໍ່ມັກສິ່ງທີ່ເຮົາມັກ, ຢ້ານລາວປະຕິເສດສະຖານທີ່ທີ່ເຮົາຢາກໄປ. ກະເລີຍເຮັດໂຕງ່າຍໆ.. ແຕ່ຜູ້ຍິງຫຼາຍຄົນກັບຄິດວ່າຜູ້ຊາຍປະເພດນີ້ມັກບໍ່ມີຄວາມເປັນໂຕຂອງໂຕເອງ, ແລະ ເປັນເສີຍໆແບບບໍ່ມີເອກະລັກ ຈຸດເດັ່ນໃນໂຕ.

5. ຜູ້ຊາຍ ດີເກີນໄປ ບາງຄັ້ງແຕ່ງໂຕຫຼາຍເກີນ : ກ່ອນຈະອອກບ້ານ ເພື່ອຢາກໃຫ້ໂຕເອງດູດີ, ຈັກໂມງ, ແຫວນ, ສາຍຄໍ.. ເຮັດຊົງຜົມ… ພະຍາຍາມໃຫ້ໂຕເອງດູດີ ເພື່ອບໍ່ໃຫ້ຜູ້ຍິງອາຍເວລາຍ່າງກັບເຮົາ, ໃນໃຈຄິດແຕ່ວ່າເຮົາດູດີແລ້ວຫຼືຍັງ, ຊົງຜົມຕົກບໍ່, ຍ່າງໂອເຄບໍ່… ແຕ່ໃນຄວາມຄິດຜູ້ຍິງກັບເບິ່ງເຮົາວ່າ ເຮົາສົນໃຈແຕ່ໂຕເອງຫຼາຍເກີນໄປ ຈົນລືມການເທັກແຄ, ເອົາໃຈໃສ່ຄວາມຮູ້ສຶກຂອງຜູ້ຍິງ.

ທັງໝົດນີ້ເປັນພຽງຕົວຢ່າງບາງອັນທີ່ແອັດມິນຍົກມາ ຈາກປະສົບການໂຕຈິງ, ຈາກການສອບຖາມຄວາມເຫັນຜູ້ຍິງຫຼາຍຄົນ ແລະ ສະຫຼຸບຫຍໍ້ໆມາໃຫ້ອ່ານເບິ່ງເພື່ອເປັນຄວາມຮູ້, ອາດຈະຖືກແນ່ ບໍ່ຖືກແນ່.. ເພາະຄວາມຄິດຂອງຄົນເຮົາມັນບໍ່ຄືກັນ. ສະນັ້ນບໍ່ຄວນເອົາຄຳເວົ້າຂ້າງເທິງນັ້ນເອົາໄປຕັດສິນວ່າຜູ້ນັ້ນຈະເປັນແນວນີ້ໄປໝົດ.. ເພາະມັນເປັນພຽງສຽງສ່ວນໃຫ່ຍ, ຫຼາຍຄົນກະອາດຈະມັກໃນສິ່ງທີ່ຕົນເອງມັກ, ມັກຄົນປະເພດແບບນັ້ນແບບນີ້.. ຜູ້ຊາຍກໍ່ຄວນອ່ານໄວ້ເປັນຄວາມຮູ້ ເພື່ອຈະປັບໂຕໃຫ້ພໍດີ ຢ່າໃຫ້ເປັນແບບນີ້ເກີນໄປ. ຜູ້ຍິງກໍ່ອ່ານໄວ້ກະດີ ເຖິງຄວາມຮູ້ສຶກຂອງຜູ້ຊາຍປະເພດນີ້. ເພາະໃນຄວາມຄິດຂອງຜູ້ຊາຍແລ້ວການທີ່ເຮັດຫຍັງໄປກໍ່ເພື່ອໃຫ້ຜູ້ຍິງ, ຍ້ອນຮັກ, ຢາກໃຫ້ທຸກຢ່າງສົມບູນ ແລະ ບໍ່ຢາກເສຍຄົນທີ່ຕົນເອງຮັກໄປ. ແຕ່ທັງໝົດແລ້ວ, ການໃຊ້ຊີວິດຄູ່ນັ້ນ ບໍ່ຈຳເປັນຕ້ອງວາງກົດແນວນັ້ນແນວນີ້, ຕ່າງຝ່າຍຕ່າງເຕີມເຕັມ ແລະ ເຮັດໃຫ້ພໍດີ ຢ່າໃຫ້ມັນລົ້ນເກີນໄປ ເທົ່ານີ້ກໍ່ໄປກັນໄດ້ແລ້ວ.. ຂອບໃຈແຟນເພສ ທີ່ເສຍເວລາອ່ານຈົນໝົດ. ໄວ້ມີໂອກາດເທື່ອໜ້າຈະມາຂຽນເລື່ອງການໃຊ້ຊີວິດຄູ່,ການປັບໂຕໃຫ້ພໍດີ ແລະ ເຂົ້າກັນ ເພື່ອໃຫ້ໄປກັນໄດ້.