ຂ່າວ

ການຄ້າໄທເຂົ້າຊີ້ແຈງເພີ່ມເຕີມຕໍ່ການຄ້າລາວ ຫຼັງມີຄຳສັ່ງໂຈະການນຳເຂົ້າອາຫານທະເລຈາກໄທ

ການຄ້າໄທເຂົ້າຊີ້ແຈງເພີ່ມເຕີມຕໍ່ການຄ້າລາວ ຫຼັງມີຄຳສັ່ງໂຈະການນຳເຂົ້າອາຫານທະເລຈາກໄທ

ດ້ານການສົ່ງອອກອາຫານທະເລໄທ ມາລາວ ມີມູນຄ່າປະມານ 39 ຕື້ກີບຕໍ່ປີ‼️

ອີງຕາມການລາຍງານຂ່າວຈາກ dailynews ສຳນັກຂ່າວຂອງປະເທດໄທ ໃນວັນທີ 24 ທັນວາ 2020 ຜ່ານມາ ທ່ານ ສົມເດັດ ສຸສົມບູນ ຫົວໜ້າກົມສົ່ງເສີມການຄ້າລະຫວ່າງປະເທດ ກ່າວວ່າ:

ທ່ານລັດຖະມົນຕີກະຊວງການຄ້າ ແລະ ເລຂາປະຈຳກະຊວງການຄ້າ ໄດ້ມອບໝາຍໃຫ້ເອກອັກຄະລັດຖະທູດຕ່າງປະເທດ ແລະ ຮອງ ລວມທັງພະແນກການທີ່ກ່ຽວຂ້ອງເພື່ອເລັ່ງຊີ້ແຈງທຳຄວາມເຂົ້າໃຈ ຕໍ່ກະຊວງອຸດສາຫະກຳ ແລະ ການຄ້າ ຂອງ ສປປ ລາວ ໃນກໍລະນີທາງການຄ້າລາວ ອອກຄຳສັ່ງຫ້າມນຳເຂົ້າອາຫານທະເລສົດຈາກປະເທດໄທ ເນື່ອງຈາກກັງວົນກ່ຽວກັບການລະບາດຂອງໂຄວິດ-19 ໃນປະເທດໄທທີ່ຕະຫຼາດກາງອາຫານທະເລ ທີ່ແຂວງສະໝຸດສາຄອນ.

“ລັດຖະບານໄທໄດ້ຊີ້ແຈງສາເຫດທີ່ແທ້ຈີງກັບທາງກະຊວງອຸດສາຫະກຳ ແລະ ການຄ້າ ຂອງ ສປປ ລາວ ໃນຕອນບ່າຍມື້ວານນີ້. ເຊິ່ງຫຼາຍອົງການໄດ້ກະກຽມຂໍ້ມູນຄວາມຈິງ ເພື່ອທຳຄວາມເຂົ້າໃຈກັບລັດຖະບານລາວໃນການຮັບຮູ້ຂໍ້ແທ້ຈິງທີ່ວ່າ ອາຫານທະເລສົດຂອງໄທ ແລະ ອາຫານແຊ່ແຂງ ບໍ່ມີພະຍາດຕິດຕໍ່ ແລະ ຈະນຳເອົາຜົນໄດ້ຮັບທາງວິຊາການກ່ຽວກັບການລະບາດຂອງໂຄວິດ-19 ວ່າການຕິດເຊື້ອບໍ່ໄດ້ແຜ່ລາມຈາກມະນຸດສູ່ສັດມາຢັ້ງຢືນ”.

ທັງນີ້, ກະຊວງການຄ້າຂອງໄທເຊື່ອໝັ້ນວ່າຈະສາມາດຊີ້ແຈງ ແລະ ທຳຄວາມເຂົ້າໃຈຕໍ່ບັນຫານີ້ກັບທາງກະຊວງອຸດສາຫະກຳ ແລະ ການຄ້າຂອງລາວໄດ້ ເຊິ່ງປັດຈບັນ, ໄທມີມູນຄ່າການສົ່ງອອກອາຫານທະເລ ແລະ ອາຫານແຊ່ແຂງໃຫ້ປະເທດລາວໃນແຕ່ລະປີມີມູນຄ່າຫຼາຍກວ່າ 100-120 ລ້ານບາດ ຫຼື ປະມານ 32 ຫາ 39 ຕື້ກີບຕໍ່ປີ.